بالحب باكتب
بالشعر باتالف
بالحس الاليف
من ابتهاج الرؤى
من رعشه شفايف
انفض ختام اللحظه
من زمنى
يغمرنى صوت البلابل
من وراشجنى
انتفض
اشوف عيونك اياتى
خمر الوضاءه
فى فضا ذاتى
ميلاد الحلم فى القلب البراح
من رضا روحك وانت ويايه
بتداوى الجراح
شهد القصيده
من رضاب حبك
ف ارتحال المنى جنبك
انا الكلام المعافر
ينكشف سرى
وتبان ملامح سترتى
اهطل مطر
وحنين
تتسرسب الحوايت
واحنا متفاهمين
لحظه خشوع الصمت
بين اثنين
لحظه شعاع المحبه
من شفتين الشيش
يفوت ينفرد على ضفتين ياسمين
ويعمر الملكوت
بالشعر باتالف
اذا خلا من لمه الصحبه
استنى طلعه هلالك
والسما رحبه
ولسانى
لسانى شجر طارح
ومتعشم ف بكره وامبارح
لو مت قبلك
خللى بالك منك
وانا ابقى اجيلك
طير خفيف ع الميه
اكل من ايدك
تمرتين حنيه
واشرب فرات العشره
والاشواق
نفس الكتاب
خليه مكانه امبارح
صورتى عليه
احضنيها
ح تلاقى نفس الملامح
انا المغنى
الكون يسعنى
اتهجى لونك الاخضر
يخضر موالى
خلينى ادوق كحك الميلاد
بدرى
عرايس طين واشوف طفولتى
مرايتى
عيال حلوين
ارسمى بلونك عيونى
جنونى
الليله متطمن
ومش خايف
قلبى الصغير كبر
على ظلك الوارف
ميلاد جديد
اتبسمى
واقسمى الفرحه
مابين اثنين
فى ليله عيد