اعتذار : من الشعر الحر:في مرحلة الازمة

بسم الله الرحمن الرحيم
__________________
الشعر ده انا كتبته في اشد مراحل الازمة يوم الخميس قبل التنحي
وياريت ما اتفهمش غلط
مستني الردود
________________
اعتذار

اعتذار لمصر امي
لا اسف
وادي اول اعتذار
من زمان انا كنت فاكر اني ابنك
والنهارده بس عرفت ان مش كل اللي منك يبقي ابنك
ويبقي ده تاني اعتذار
وده لاني مش لوحدي في الحكاية
فيه كتير كانوا معايا من البداية
قعدنا نص العمر نتاوب
ونسمع نداكي ونمشي من غير ما نتجاوب
ولما جات الصحوة ... قمنا
قمنا نتطهر وننزع السواد من قلوبنا
وعملنا ثورة حرية
ثورة عدالة وديموقراطية
والثورة دي ثورة بيضا ما فيش كلام
والثورة لازم فيها شيء من الجنون
والجنون ما اجمله بس لازم له لجام
اصل الكلام عن الحرية والعدالة والمطالب ما اسهله
بس لو ننسي الخطر يبقي الكلام ما اجهله

...
ناس تقولك خلاص زهقنا مـ الفساد
بس يا اخواننا ايه هناخد مـ العناد
يعني بس لو نفكر في اللي حاصل واللي جاي
كنا نلقي فيه مؤامرة مـ اللي رايح واللي جاي

الكلام ده مش بييدعوا للاستكانة
بس لو نضيع يوم وطننا تبقي دي اكبر خيانة
فيها ايه لو نحسبها بالمكاسب والخسارة
علشان وطننا التأني والتروي مش خسارة
في كتير عيون لئيمة مختفية
عماله تزرع خوف وشك فيك وفيا

ومـ البداية واحنا بندبح روح الوطن
ودبحنا كان بطيء ضاع معاه حلم الوطن
...
حلم الوطن اصبح رغيف
وحلمنا ما بقاش نضيف
وكل ده والخلق لسه متبتة جوه الميدان
القضية مش ثقة ولا ضمانة
القضية عايزة عقل مش جنان
ليه نهيأ للعدو الاحوال
دا غير بطاله وكساد تجارة ووقف حال
ممكن تقول وانت بتقرا انني غبي
لكن ما فيش بنا نبي
ممكن اكون غلطان
ويمكن تكون انت كمان
ممكن تقولي دا دم شهدا .. ازاي يضيع
ايوة لكن هما ماتوا لاجل الوطن ما يوم يضيع
وانا.. ما املكش غير احسدهم اوي علي قتلهم
وياريتني انا اموت زيهم
اقتلني واحيي الوطن
...
لو يوم هايجي واشوف الوطن بينزف دم
يبقي اموت احسن ما اعيش واشيل الهم

وان جيت فيوم ادق بابها من تاني
تفتحلي مصر
اضحكلها. . . تبتسملي
واسالها ...بسمتك ليه
تقولي مش عارفه .. من فرحي ولا احزاني

وشوف بقي من كلامي نسيت الاعتذار
فاعذروني ما هو برده جو راسي زحمة مـ الافكار

وفي النهاية دا كلام
يبقي صادق يبقي كاذب برده في الاخر كلام

ولو كذبت او كلامي كان طويل
يبقي ليكم مني اعتذار