المسئولية:

آديك أهو خدت العضوية
وصبحت فى اللجنة الأساسية
أبو زيد زمانك وحصانك
الكلمة والخدمة الوطنية ..
ودى مسئولية

دى مسئولية عزيزة عليا
معزة الروح و الحرية
معزة العسكرى سلاحه
و أكتر ، لكن أنا إيه وحديا ؟
مفيش أنا ، فيه إحنا يا صاحبى
أنا و إنت و أنت و هو و هيه
علينا نعمل الاشتراكية
من كلمة حلوة للقمة حلوة
و بيت و كسوة و ناس عايشين
آدى القضية


مفيش محال والعزم معانا
والعلم بينور دنيانا
والفكر بيجسم أحلامنا
قدامنا شايفينها وشايفانا ..
شايفين رايتنا ف حضن النسمة
مرفرفة بستاشر نجمة
على مدينة عربية
معرفش من أى الأقطار
.. حرية و اشتراكية و وحدة
مكتوب حروفها بمليون وردة
على صدر بلدة عربية
معرفش من أى الأقطار
صناعة كبرى .. ملاعب خضرا
تماثيل رخام ع الترعة وأوبرا
فى كل قرية عربية
دى ماهيش أمانى وكلام أغانى
ده بر تانى قصادنا قريب
يامعداوية

ريسنا ملاح ومعدينا
عامل وفلاح من أهالينا
ومنا فينا الموج والمركب
والصحبة والريس والزينة
نفوت على الصحرا تخضر
نشقى .. خدود الناس تحمر
والمسئولية مابين أحضاننا
مجاديف تقربنا من البر
أصغر مهمة برضك مهمة
دى الثورة همة و ذمة و دين
وانسانية ..


أحلف بقرآنى وإنجيلى
بهدف عظيم دايماً يناديلى
بالمعركة وسهرها
بالقاهرة وقمرها ..
بالقاهرة اللى ماحد قهرها ..
أحلف بكل بطل فى عمل
بالفلاحين بالعمال
بالفن اللى بيدينا أمل
وبالجنود على كل حدود
وبالميثاق اللى جعلته منارى ودليلى ..
أحلف بكل صبى وصبية
بعيونهم الحلوة العربية
بجمال وجرح قديم فى جبينه
أحلف وأعاهد أعيش مجاهد
والرب شاهد إنى أمين
ع المسئولية

نحلف يمين بالله تعالى
نحلف بقوتنا الفعالة
الاتحاد الاشتراكى العربى
نختاره مبدأ و رسالة
و مسئولية