رباعيات صلاح جاهين

خرج ابن آدم من العدم قلت : ياه
رجع ابن آدم للعدم قلت : ياه
تراب بيحيا ... وحي بيصير تراب
الأصل هو الموت و الا الحياه ؟
===============
ضريح رخام فيه السعيد اندفن
و حفره فيها الشريد من غير كفن
مريت عليهم .. قلت يا للعجب
لاتنين ريحتهم لها نفس العفن
===============
ياما صادفت صحاب و ما صاحبتهمش
و كاسات خمور و شراب و ما شربتهمش
أندم علي الفرص اللي انا سبتهم
و الا علي الفرص اللي ما سبتهمش
===============
و الكون ده كيف موجود من غير حدود
و فيه عقارب ليه و تعابين ودود
عالم مجرب فات و قال سلامات
ده ياما فيه سؤالات من غير ردود
===============
أنا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام
===============
يا باب يا مقفول ... إمتي الدخول
صبرت ياما و اللي يصبر ينول
دقيت سنين ... و الرد يرجع لي : مين ؟
لو كنت عارف مين أنا كنت أقول
===============
أحب أعيش ولو في الغابات
أصحي كما ولدتني أمي و ابات
طائر .. حوان.. حشرة .. بشر ..بس أعيش
محلا الحياة.. حتي في هيئة نبات
===============
سهير ليالي و ياما لفيت و طفت
و ف ليه راجع في الضلام قمت شفت
الخوف ... كأنه كلب سد الطريق
و كنت عاوز أقتله .. بس خفت
===============
كان فيه زمان سحليه طول فرسخين
كهفين عيونها و خشمها بربخين
ماتت لكين الرعب لم عمره مات
مع إنه فات بدل التاريخ تاريخين
===============
عجبتني كلمة من كلام الورق
النور شرق من بين حروفها و برق
حبيت أشيلها ف قلبي .. قالت حرام
ده أنا كل قلب دخلت فيه اتحرق
===============
رقبه قزازة و قلبي فيها انحشر
شربت كاس و اتنين و خامس عشر
صاحبت ناس م الخمرة ترجع وحوش
و صاحبت ناس م الخمرة ترجع بشر
===============
ليه يا حبيبتي ما بيننا دايما سفر
ده البعد ذنب كبير لا يغتفر
ليه يا حبيبتي ما بيننا دايما بحور
أعدي بحر ألاقي غيره اتحفر
===============
ورا كل شباك ألف عين مفتوحين
و انا وانتي ماشيين يا غرامي الحزين
لو التصقنا نموت بضربة حجر
و لو افترقنا نموت متحسرين
===============
نوح راح لحاله و الطوفان استمر
مركبنا تايهه لسه مش لاقيه بر
آه م الطوفان وآهين يا بر الأمان
إزاي تبان و الدنيا غرقانه شر
===============
علي رجلي دم .. نظرت له ما احتملت
علي إيدي دم.. سألت ليه ؟ لم وصلت
علي كتفي دم.. و حتي علي رأسي دم
أنا كلي دم .. قتلت ؟ ..... والا اتقتلت
===============
انا كل يوم أسمع ........ فلان عذبوه
أسرح في بغداد و الجزاير واتوه
ما أعجبش م اللي يطيق بجسمه العذاب
و اعجب من اللي يطيق يعذب أخوه
===============
ينبوع و في الحواديت أنا سمعت عنه
إنه عجيب .. و ف وسط لهاليب لكنه
شقيت كما الفرسان طريقي .. لقيت
حتي الخنازير و الكلاب شربوا منه
===============
يا قرص شمس ما لهش قبة سما
يا ورد من غير أرض شب و نما
يا أي معني جميل سمعنا عليه
الخلق ليه عايشين حياه مؤلمة
===============
شاف الطبيب جرحي وصف له الأمل
وعطاني منه مقام يا دوب ما اندمل
مجروح جديد يا طبيب و جرحي لهيب
ودواك فرغ مني .... و إيه العمل
===============
أعرف عيون هي الجمال و الحسن
و اعرف عيون تاخد القلوب بالحضن
و عيون مخيفة و قاسية وعيون كتير
وباحس فيهم كلهم بالحزن
===============
إيش تطلبي يا نفس فوق كل ده
حظك بيضحك و انتي متنكده
ردت قالت لي النفس : قول للبشر
ما يبصوليش بعيون حزينة كده
===============
إقلع غماك يا تور وارفض تلف
إكسر تروس الساقية و اشتم وتف
قال : بس خطوة كمان .. وخطوة كمان
يا اوصل نهاية السكة يا البير تجف
===============
يا حزين يا قمقم تحت بحر الضياع
حزين أنا زيك و إيه مستطاع
الحزن ما بقالهوش جلال يا جدع
الحزن زي البرد ... زي الصداع
===============
في يوم صحيت شاعر براحة و صفا
الهم زال و الحزن راح و اختفي
خدني العجب و سألت روحي سؤال
أنا مت ؟ و لا وصلت للفلسفة
===============
الفيلسوف قاعد يفكر سيبوه
لا تعملوه سلطان و لا تصلبوه
ما تعرفوش إن الفلاسفه يا هوه
اللي يقولوه بيرجعوا يكدبوه
===============
علي بعد مليون ميل من أرضنا
من الفراغ الكوني بصيت أنا
لا شفت فرق بين جبال و بحور
و لا شفت فرق ما بين عذاب أو هنا
===============
إنسان أيا إنسان ما أجهلك
ما أتفهك في الكون و ما أضألك
شمس وقمر و سدوم و ملايين نجوم
و فاكرها يا موهوم مخلوقه لك
===============
نظرت فوق للنجوم و انا ساير
رجليا عترت في الحفر و الحجاير
بقيت أقول و انا ع التراب: يا سلام
مش بس عبره أخذت لكن عباير
===============
- يا نجم .. نورك ليه كده بيرتجف ؟
هو انت قنديل زيت ؟ أو تختلف
- أنا نجم عالي .. بس عالي قوي
و كل ما انظر تحت اخاف انحدف
===============
السم لو كان في الدوا منين يضر ؟
و الموت لو عدونا .. منين يسر؟
حط القلم في الحبر و اكتب كمان
.. و العبد للشهوات .. منين هو حر؟
===============
وقفت بين شطين علي قنطــــــــــــــــــرة
الكدب فين و الصدق فيـــــــــــن يا تري
محتار ح اموت .. الحوت خرج لي وقالي
هو الكلام يتقــــــــــــاس بالمســـــــــــطرة
===============
سرداب في مستشفي الولاده طويل
صرخات عذاب ورا كل باب وعويل
.. وفي الطــــــريق متزوقين البنات
متزوقـــــــــــــين للحب و المواويل
===============
الدنيا أوده كـــــــــــبيره للانتظار
فيها ابن أدم زيه زي الحـــــــمار
الهم واحد .. و الملل مشــــــترك
و مفيش حمار بيحاول الانتـــــحار
===============
أيوب رماه البين بكل العـــــــــلل
سبع سنين مرضان وعنده شلل
الصــــبر طيب .. صبر أيوب شفاه
بس الأكـــــــــاده مات بفعل الملل
===============
نسمة ربيع لكن بتكوي الوشـــــــوش
طيور جميلة بس من غير عشـــوش
قلوب بتخفق إنما وحـــــــــــــــــدها
هي الحياه كده .. كلها في الفاشوش
===============
يا طير يا عالي في الســــــما طظ فيك
ما تفتكرشي ربنا مصطــــــــــــــــفيك
برضـــــــــــك بتاكل دود و للطين تعًًًًودً
تمـــــــــص فيه يا حلو .. و يمص فيك
===============
كروان جريح مضروب شعاع م القمر
سقط من السموات فؤاده انكســـــــــر
جريت عليه قطه علشان تبلعـــــــــــه
أتاريه خيال شعراء و مالهـــــوش أثر
===============
ياللي نصحت الناس بشــــــــــــــرب النبيت
مع بنت حلوه .. وعود , وضحك , وحديت
مش كنت تنصحهم منين يكســــــــــــــــبوا
تمن ده كله ؟ ... و الا يمكن نســـــــــــيت
===============
ما حد في الدنيا واخد جزاتــــــــــــــــــه
و لا حــــــــــــــــد بيفكر في غير لذاذاته
ما تعرفيش يا حبيبتي .. أنا و انتي مين؟
إنتي عروس النيل ... و أنا النيل بذاته
===============
رقاصه خرسا و رقصه من غير نغــم
دنيا . . يا مين يصالحها قبل النـــــدم
ساعتين تهز بوجههـــــــــــــــا يعنـي
يترجرجوا نهديها يعني نعـــــــــــــــم
===============
إخطفني ياللي تحبني ع الحصان
الدنيا قالت يوم في ماضي الزمان
إخطفني ياللي تحبني ع الـــــفرس
الدنيا قالت .. قام خطفها الشيطان
===============
من بين شقوق الشيش و شقشقت لك
مع شهقة العصافير و زقزقـــــــت لك
نهار جديد انا . . قوم نشوف نعــمليه
انا قلت يا ح تقتلني .. يا ح اقــــــــتلك
===============
جالك أوان ووقفت موقف وجـــود
يا تجود بده يا قلبي يا بده تجــــود
ما حد يقدر يبقي علي كل شـــــــئ
مع إن – عجبي – كل شئ موجود
===============
جالك اوان وعرفت مشي الجنايــــــــز
كيف شفتها يا عبد رب اللذايــــــــــــذ
قال : شفت شيل بالحيل فقير أو اميـــر
كما شالوا في الخمامير فواضي القزايز
===============
أنا كنت شئ و صبحت شئ ثم شــئ
شوف ربنا .. قادرعلي كل شـــــــئ
هز الشجر شواشيه ووشوشني قال :
لابد ما يموت شئ عشان يحيا شئ
===============
يا مشرط الجراح أمانة علـــــــــــيك
و انت ف حشايا تبص من حواليــك
فيه نقطة سوده في قلبي بدأت تبان
شيلها كمان .. و الفضل يرجع إليك
===============
كيف شفت قلبي و النبي يا طبيــــــــــــب
همد و مات و الا سامع له دبيـــــــــــــب
قاللي لقيته مختنق بالدمـــــــــــــــــــــوع
و ما لوش دوا غير لمسه من إيد حبيب
===============
تسلم يا غصن الخوخ يا عود الحطـــــــــب
بييجي الربيع .. تطلـــــــــــع زهورك عجب
و انا ليه بيمضـــــــــــي ربيع وييجي ربيع
و لسه برضك قلــــــــــــــــــبي حتة خشب
===============
قلبي عليل يا ناس و في الكاس دواه
مديت له إيدي شربت م اللي حــــواه
جنبي الشمال خف .. اليمين اتــــوجع
و إيه يداوي الكبد م اللي كـــــــــــواه
===============
.. دي مزكرات و كتبتها من ســـــــــنين
في نوتة زرقا لون بحور الحنيــــــــــــن
عترت فيها .. رميتها في المهمـــــــلات
وقلت صحيح أما صحيح كلام مخبولين
===============
دخل الشتا وقفل البيبان ع البـــيوت
وجعل شعاع الشمس خيط عنكبوت
وحاجات كتير بتموت في ليل الشــتا
لكن حاجات أكتر بترفض تمــــــوت
===============
الدنيا من غير الربيع مــــــــيته
ورقة شجر ضعفـــــــانه و مـــفـــــتــته
لا يا جدع غلطان تأمل وشوف
زهر الشتا طالع فــــــــي عز الشـــــتا
===============
ياللي انت بيتك قش مفروش بريش
تقوي عليه الريح .. يصبح ما فيش
عجبي عليك حواليك مخالب كـــــبار
و ما لكش غير منقار و قادر تعيش
===============
سمعت نقطة ميه جوه المحيـــــــط
بتقول لنقطه ما تنزليش في الغويط
أخاف عليكي م الغرق .. قلـــــت أنا
ده اللي يخاف م الوعد يبقي عبيط
===============
بحر الحياه مليان بغرقي الحياه
صرخت خش الموج في حلقي ملاه
قارب نجاه .. صرخت قالوا مفيش
غير بس هو الحب قارب نجاه
===============
فارس وحيد جوه الدروع الحديد
رفرف عليه عصفور وقال له نشيد
منين .. منين.. و لفين لفين يا جدع
قال من بعيد و لسه رايح بعيد
===============
كان فيه قمر كأنه فرخ الحمام
علي صغره دق شعاع شق الغمام
أنا كنت حاضر قلت له ينصرك
إشحال لما حتبقي بدر التمام
===============
النهد زي الفهد نط اندلع
قلبي انهبش بين الضلوع و انخلع
ياللي نهيت البنت عن فعلها
قول للطبيعة كمان تبطل دلع
===============
صوتك يا بنت الإيه كأنه بدن
يرقص يزيح الهم يمحي الشجن
يا حلوتي و بدنك كأنه كلام
كلام فلاسفه سكروا نسيوا الزمن
===============
كرباج سعاده وقلبي منه اجلد
رمح كأنه حصان و لف البلد
و رجع لي نصل الليل و سألني .. ليه
خجلان تقول انك سعيد يا ولد
===============
مزيكة هادية الكون فيها انغـــــمر
وصيف و ليل و عقد فل و سمر
يا هلتري الناس كلهم مبسوطين
و يا هلتري شايفين جمال القمر ؟
===============
إنشد يا قلبي غنوتك للجمــــــــــــــــــال
و ارقص في صدري من اليمين للشمال
ما هوش بعيد تفضل لبكره سعيــــــــــد
ده كل يوم فيه الف الف احتمـــــــــــــال
===============
آه لو انا و محبوب جزنا الفضـــــا
في سفينة وحدينا .. واشيا رضـــا
ساعة صفا تعجبنا نرجع لهــــــــــا
و الهم قبل ما ييجي .. يبقي مضـى
===============
أنا إله الوجد رب الهيــــــــــــــــام
أضرب بسهم الوهم وهم الغـــــرام
و هم الغرام من كتر ما هو لذيـــــذ
رشقت انا ف صدري جميع السهام
__________________
حدوته عن جعران و عن خنفســــــــــه
اتقابلوا حوا بعض ساعة مســـــــــــــــا
و لا قال لهم حد اختشوا عيب حـــــرام
و لا حد قال دي علاقة متدنســــــــــــــة
===============
ياللي عرفت الحب يوم و انطــــــــــــوي
حسك تقال مشتاق لنبع الهـــــــــــــــوي
حسك تقول مشتاق لنبع الغــــــــــــــــرام
ده الحب .. مين داق منه قطره...ارتوي
===============
زحام و أبواق سيارات مزعجـــــة
للي يطول له رصيف.. يبقي نجـــا
لو كنت جنبي يا حبيبي أنــــــــــــا
مش كنت أشوف إن الحياة مبهجة
===============
إيديا في جيوبي وقلبي طــــــــرب
سارح في غربة بس مش مغترب
و حدي لكين ونسان و ماشي كده
وبابتعد ما اعرف .. أو باقـــــترب
===============
يا ميت ندامه ع القلوب الخـــــــــــلا
لا محبة فيها و لا كراهـــــــــــه ولا
حتي يا قلبي الحزن ما عادش فيـــــك
معلهش .. لك يوم برضه راح تتملا
===============
مرحب ربيع مرحب ربيع مرحبــــــــــه
يا طفل يا للي ف دمي ناغا وحبــــــــا
علشان عيونك يا صغنن هويــــــــــــت
حتي ديدان الأرض و الأغربــــــــــــــة
===============
فتحت شباكي لشمس الصبـــــــــــــــــاح
ما دخلش منه غيــــــــــر عويل الريـــاح
و فتحت قلبي عشان ابوح بالألـــــــــــــم
ما خرجش منه غير محبه و سمــــــــاح

===============
غمست سنك في السواد يا قلـــــــــــــــم
عشان ما تكتب شعر يقطر ألــــــــــــــــم
مالك جرالك إيه يا مجنون ... و ليــــــــه
رسمت ورده وبيت و قلب و علـــــــــــم
===============
انا الذي عمري اشتياق في اشتيـــاق
و قطر داخل في محطة الـــــــــفراق
قصدت نبع السم وشربت ســـــــــم
من كتر شوقي وعشمي في التريـــاق
===============
انا الذي عشت الزمن مضيعـــــــــه
بروح حزينة معفنة مضعضعــــــه
زرعت شجرة سنط لجل انجــــــرح
لقتها شعر البنت و مفرعــــــــــــه
===============
لو فيه سلام في الأرض وطمان و أمن
لو كان مفيش و لا فقر و لا خوف جبن
لو يملك الانسان مصير كل شـــــــــــئ
انا كنت اجيب للدنيا ميت ألف ابــــــــــن

===============
العشب طاطا للنسايم و نـــــــــــــــــــــخ
أخضر طري مالهش في الحســـــــن أخ
عصفور عبيط انا .. غاوي بهجه و غنا
ح انزلهنا.. و انشا لله يهبرني فــــــــخ
===============
أوصيك يابني بالقمر و الزهـــــــــــــور
أوصيك بليل القاهرة المسحـــــــــــــور
و إن جيت في بالك .. إشتري عقد فل
لأي سمرا.. وقبري إوعك تـــــــــزور

===============
غمض عينيك و ارقص بخفة و دلع
الدنيا هي الشابة و انت الــــــــجدع
تشوف رشاقة خطوتك تعبــــــــدك
لكن انت لو بصيت لرجليك ....تـقع
\===============
حاسب من الاحزان و حاســـــــب لها
حاسب علي رقابيك من حبلـــــــــــها
راح تنتهي و لابد راح تنتهــــــــــي
مش انتهت أحزان من قبلهــــــــــا؟
\===============
يأسك و صبرك بين إيديك و انت حر
تيأس ما تيأس الحياه راح تــــــــمر
أنا دقت مندا ومندا عجبي لقيــــــت
الصبر مر و برضك اليـأس مـــــــر
عجبي !!
===============
ولدي نصحتك لما صوتي اتنبــــــــــــح
ما تخفش من جني و لا من شبـــــــــح
و ان هب فيك عفريت قتيل إسألـــــــــه
ما دافعش ليه عن نفسه يوم ما اندبح
\===============
ولدي إليك بدل البالون ميت بالــــــون
انفخ وطرقع فيه علي كل لـــــــــــون
عساك تشوف بعينك مصيرالرجــــــال
المنفوخين في السترة و البنطلـــــون
\
===============
خوض معركتها زي جدك ما خــــاض
صالب و قالب شفتك بامتـــــــــــعاض
هي كده...ما تنولش منها الأمـــــــل
غير بعض صد ورد ووجاع مخاض
\
===============
كام اشتغلت يا نيل في نحت الصخور
مليون بئونه و الف مليون هاــــتور
يا نيل أنا ابن حلال و من خلفتــــــك
و ليه صعيبه علي بس الأمــــــــور

===============
منين أجيبها كلمه متألمـــــــــــــــــة
لعيبه فايره حايره و مصممــــــــــه
منين اجيبها كلمه تكون بنـــت ارض
تشفي اللي ما شافهوش كلام السمـا
===============
أنا قلت كلمة و كان لها معنييـــــــــن
كما بطن واحده و توأمين زي وشين
لو دنيا شر.. التوأم الخير يمـــــــوت
لو دنيا خير .. الشر ح يعيش مــنين

===============
أنا اللي بالأمر المحال اغتــــــــــــوي
شفت القمر نطيت لفوق في الهـــــوا
طلته ما طلتوش إيه انا يهمنـــــــــي
و ليه .. ما دام بالنشوة قلبي ارتوي

===============
بره القزاز كان غيم و أمطار و بــــــــرق
ما يهمنيش – أنا قلت – و لا عندي فرق
غيرت رأيي بعد ساعة زمـــــــــــــــــان
و كنت في الشارع .. و في الجزمة خرق
===============
عيني رأت مولود علي كتف أمـــــــــــه
يصرخ تهنن فيه يصرخ تضــــــــــــمه
يصرخ تقول يا بني ما تنطق كـــــــلام
ده اللي ما يتكلمش يكتر همـــــــــــــه
===============
يا عندليب ما تخافش من غنوتك
قول شكوتك و احكي علي بلوتك
الغنوه مش ح تموتك إنمــــــــــا
كتم الغنا هو اللي ح يموتــــــــك

===============
ياللي بتبحث عن إله تعــــــــــــبده
بحث الغريق عن أي شئ ينجـــده
الله جميل و عليم و رحمن رحــيم
أجمل صفاته .. وانت راح توجده
===============
حقرا و فوق كوكب حقير محتقـــــــر
في الكون تكون دنياكو إيه يا بــــــقر
رملايه من صحرا ؟ لكين إيش تقول
و الكون بحاله جوه عقل البشــــــر
===============
لا تجبر الانسان و لا تخـــــــــيره
يكفيه ما فيه من عقل بيحيــــــره
اللي النهارده بيطلبه و يشتهــــيه
هو اللي بكره ح يشتهي يغيـــــره

===============
ياللي في حماه الشمس تلقي المــــلاذ
و ألف بكره و بكره .. في ضلوعه لاذ
مين أنت ؟ مارد ؟ رب ؟ قال لأ ده بس
انا اللي باروي القمح و اسقي الفــولاذ

===============
غسل المسيح قدمك يا حافي القـدم
طوبي لمن كانوا عشانك خــــــــدم
صنعت لك نعليك أنا يا أخــــــــــــي
مستني إيه .. ما تقوم تدوس العدم
===============
البط شال عدي الجبال و البحــــــور
ياما نفسي اهج .. احج ويا الطــيور
أوصيك يا ربي لما اموت .. و النبي
ما تودنيش الجنه .. للجنه ســـــــور
===============
طال انتظاري للربيع يرجــــــــــــــع
و الجو يدفا و الزهور تطلــــــــــــع
عاد الربيع عرمرم شبـــــــــــــــاب
إيه اللي خلاني ابتديت افــــــــزع ؟
===============
و لو اتضنيت و فنيت وعمري انفرط
مش عاوز الجأ للحلول الوســـــــــط
و كمان شطط و جنون مانيش عــاوز
يا مين يقول لي الصح فين والغلــــط

===============
عاد الربيع كأنه طعم الحــــــــــــــــــب
و الحب نار جوه العروق بتصـــــــــب
اتمتع ازاي بيه وانا متقطـــــــــــــــع
من كتر خوفي لا في الخطيئة يطب ؟
===============
ازاي شبابنا يقوم و ياخـــــــــد دوره
من غير صراخ يئذيه و يجرح زوره
يا هلتري أحسن له يقعد ساكـــــــــت
أو ينترك و لو خرج عن طــــــوره ؟
===============
عيني رأت عصفور ووياه ابـــــــــنه
بيحدفه في الريح و ياخده ف حضنه
نوبتين و تالت نوبه – عجبي عليهم –
كانوا سوا بيرفرفرا و يغنـــــــــوا

===============
احسن ما فيها العشق و المعشقــــــة
و شويتين الضحك والتريقـــــــــــــة
شفت الحية . لفيت . لقيت الألــــــــذ
تغييرها . و ده يعني التعب و الشقا

===============
عجبي علي العجب العجيب العجاب
لما الحقيقة تطل بعد احتجاب
و تروح و تحلا وفجأة تصبح مفيش
كمثل طراطيش بحر ياما خد و جاب

===============
في الهو ماشي يا بهلوان إش إِش
يا فراشة منقوشة علي كل وش
شقلبت عقلي و عقلي شقلبني
و كنت باحسبني بقيت ما اندهش

===============
وقفت ساعة الصبح باغسل سناني
قالت لي شايف قوتي و لمعاني ؟
إيش تطلب اليوم مني ضحكة أسد ؟
والا ابتسامة اعلانات أمريكاني ؟

===============
الحلو يم اليم صابــــــــــح رايح
سارح في حضن الميه سابح سايح
الحلو داب في البحر , قلــــت أدوقه
وجدت لسه البحر برضك ماــــــلح

===============
يا كل كلمة للعجب في قامــــــــــــوس
انسكلوبيديا لسان العرب أو لا لاروس
تعالوا نجدة . ده لسه في عصـــــرنا
الشمس و البحر العريض بالفـــلوس

===============
الموج تلول تهبط وتطلع تلــــــــــــول
يا بحر خدني الشط صاحبك ملـــــــول
و الا بلاش الشط ح اعمل به أيـــــــه
ده ريحته طحلب مهري و ام الخلــول

===============
ما آنتاش بتلعب ليه يا روح بابــــا ؟
و لا عسكري و لا لص في عصابة ؟
إلعب أسد أو ديب رهيب أو غـــــزال
دي الدنيا في نهاية المطاف غابـــــة

===============
ورد في ورق سلوفان يا حلوة اهديلك ؟
و الا انقله بالطين في الشتلة و اجيلـــــك
الأولاني لو وحا بحنــــــــــــــــــــــانــي
عجبي علي التاني بإيــــــــه يوحيلــــــــك

===============
أنا قلبي كوكب و انطلق في المدار
حواليكي يا محبوبتي يا نور ونـــار
يلف مهمــــا يلف ما بيكتفــــــفيش
وتمللي نصه ليل و نصه نهــــــــار

===============
الأرض شوك أيوه لكين هايش
و الحمرة مش يعني الطريق حايش
دي دمنا السيال .. وبشرة خيـــــــر
ان انتي عايشة و ان كنت أنا عايــش
===============
إيه اللي خدته من مرور السنــــــين
يا قلبي الا دمعتك و النيــــــــــــــين
بتئن و ترجع و بتفرح و ترجع تحــن
مع إن مش كل البشـــــــــــر فرحانين

===============
اوقات أفوق و يحل عني غبــــــــــايا
واشعر كأني فهمت كل الخبايـــــــــــا
و افتح شفايفي علشــــــان اقول الدرر
ما أقولش غير حبة غزل في الصبايــــا

===============
عيني رأت مخلوق في غاية البشاعة
أنا قلت له لما تأملته ساعـــــــــــــة
اللذه و الموت علموك اللــــــــــزج
و انا علموني الفلسفة و الشجاعــة
===============
غطس وقب الموج نهود بمبي
من ألف جيل جمالات ما تعلم بي
يا قلبي عيب دول امهاتنا القدام
أستغفر الله العظيم ربـــــــــــــي

===============
علقت في المسمار قناع مهزلة
ومعاه قناع مأساة بحزنه ابتـــلا
بصيت لقيتهم يشبهوا بعضهـــم
واهو ده العجب يا ولاد و الا فلا

===============
ظهر المسيح الحي علي سفح ربـــــــــوة
و نزل بهالة الضي و قعد في قهـــــــــوة
بصوا .. تعالوا .. قالوا خليه في حالــــــــه
الناس في حالهم يا بني .. مالهمش دعوة

===============
لولا اختلاف الرأي يا محـــــترم
لولا الزلطتين ما لوقود انضرم
و لولا فرعين ليف سوا مخاليف
كان بيننا حبل الود كيف اتبرم ؟

===============
يا وردة قلبي معاكي في الريح لعب
لا تعبتي م الريح و لا قلبي تعــــــــب
احنا كده : نرتاح في صخب الجنون
و في السكون بنخاف قوي و نترعب

===============
مركب ورق من نفخة تتطـــــــــوح
ركبتها و الكل بيــــــــــــــــلوح
سوحت فيها اتنين و خمسين سنــــه
للآن ..... و لا بتغرق و لا تـــــروح

===============
عالجسر فت الصبح تحت الضباب
بين اللي لسه بينغرس و اللي طاب
ما اهتز قلبي لنبت طالع جديـــــــد
قد اللي ماشي .. وتحت باطه كتاب

===============
يا خالق الكون بالحساب و الجبر
و خالقني ماشي بلختيار و الجبر
كل اللي حيلتي زمزمية أمـــــــل
وازاي تكفيني لباب القــــــــــــبر؟

===============
قاعدة قناني الخمر ساكتة و ساهية
مع ابن آدم في الشبه متناهيـــــــــــة
مفيش كده روقان في لحظة تشوفهم
و بعدها بلحظه يودوا في داهيــــــه

===============
حتة محارة وجدتها في يوم لقيـة
قالت لي شوف كيف الطبيعة شقية
نظرت للكهف اللي فيها و لقيــــت
إن الطبيعة كمان لا أخلاقيــــــــــة

===============
بلياتشو قال إيه بس فايدة فنونــــي ؟
و تلات وقق مساحيق بيلونونـــــــي
و الطبل و المزامير و كتر الجعـــــــير
إذا كان جنون زبوني زاد عن جنوني
===============
نقطة مرارة كمان علي مشروبـــــــــــي
دوبها يا ساقي حسب مطلوبـــــــــــــــي
طعب الحياة .. مش برضه فيها و فيها ؟
ليالي وردي و نهارات خروبــــــــــــي ؟

===============
وسط الحطام اتفرجوا يا أنـــــــــام
تمثال ملك . و مبوله م الرخــــــام
لتنين نحتهم نفس أسطي الحجــــر
و كانوا ذات يوم كتلتين لسه خــام

===============
عيد و العيال اتنططوا ع القبـــــــور
لعبوا استغمايه .. و لعبوا بابــــــور
و باللونات و نايلونات شفتشـــــــي
و الحزن ح يروح فين جنب السرور

===============
أنا قلبي كورة و الفراودة أكــــــــــم
ياما اتنطح و انشاط و ياما اتعكـــــم
و اقول له كله ح ينتهي في المعـــاد
يقول بساعتك ؟ و الا بساعة الحكم ؟
===============
الضحك قال يا سم ع التكشيـــــــر
امشير و طوبه وانا ربيعي بشيـر
مطرح ما باظهر بانتصر ع العدم
انشالله أكون رسماية بالطباشيــر

===============
أهوي الهوي و همس الهوي في العيون
وبسمة المغرم ودمعه الحنـــــــــــــــون
و زلزلات الحب نهد الصبـــــــــــــــــــــا
أكون انا المحبوب أو لا أكــــــــــــــــون
===============
يا ملونين البيض في شم النسيـــــم
لون الحنين و الشوق و خمر النديم
ما تعرفوش سايق عليكو النبــــــي
تلونوا الأيام بلون النعيــــــــــــــم ؟

===============
الدنيا صندوق دنيا .. دور بعــــد دور
الدكة هي .. و هي كل الديكـــــــــور
يمشي اللي شاف ويسيب لغيره مكان
كان عربجي أو كان امبراطــــــــور

===============
قطي العزيز راقد علي الكنبــــــات
في نوم لذيذ .. و بيلحس الشنبات
و انا كل عين فنجان مدلدق قلــق
صدق اللي قال إن الحياة منابات

===============
قالوا السياسة مهلكة بشكل عـــــــــــام
و بحورها يا بني خشنة مش ريش نعام
غوص فيها تلقي الغرقانين كلهــــــــــم
شايلين غنايم .. و الخفيف اللي عـــــام

===============
سلام سلام سلام سلام ... سلام
كلام كلام كلام كلام ... كلام
هز الورق يا صاحبي كدهــــوه
يطلع كلام سلام .. و سلام كلام

===============
فوق تحت . ورا قدام . يمين شمـــال
في الجو . تحت الميه . أو في الرمال
طلب الكمال يحرم علي الممـــــــــكن
و الممكنات دول محرومين م الكمال

===============
هات يا زمان و هات كمان يا زمان
غير بسمة الشجعان مامني يــــبان
هو اللي داق الفرحة يوم ثورتـــــه
يقدر يعود و لا ثانية للأحــــــزان ؟

===============
عبثا باقول واقرا في سورة عبس
ماتلومش حد إن ابتسم أو عبس
فيه ناس تقول الهزل يطلع جــــد
و ناس تقول الجد يطلع عبـــــث

===============
يومي علي الله تنتهي و تغيــــب
الشمس و تعود تاني يوم لهاليب
زي الحياة مأساه و من كترهــــا
بقي لا انتهاءها و ابتداءها عجيب

===============
علم اللوع اضخم كتـــــــــاب في الأرض
بس اللي يغلط فيه يجيـــــــــبــه الأرض
أما الصراحة فأمرها ســـــــــــــــــاهل
لكن لا تجلب المال و لا تصون العرض

===============
أنا كان لي أب . و كان رئيس محكـــمه
ستين سنة .. في قضية واحدة أترمي
ستين سنة و طلع براءة و خــــــــرج
يشكي الحياة و الموت لرب السمـــــا
عجبي !!!!
===============
قالوا ابن آدم روح و بدنه كفـــــــــــن
قالوا لأ بدن . قالوا لأ ده روح في بدن
رفرف فؤادي مع الرايات في الهــــــوا
أنا قلت لأ روح في بدن في وطــــــــن

تحياتى

soo nice i like :D

بجد بشكرك يا مصطفى على الرباعيات دى لانى بحب صلاح جاهين جدا جدا جدا

حقا مبدع يا تيف وندعيله ربنا يعينه فى الامتحانات