يا أغلى من روحي علي من تكون؟

يا قوافي الشعر ليه هذا العزوف
اكتبي عن غالي القلب بغيابه


عبّري عن صدق شوقي ياحروف
عن رعشة الخافق ظنونه وارتيابه


ليه حرفك ماينظم له الحروف
خبريه إني أحبه وافدي ترابه


يا هوى روحي ياالسمح العطوف
يا ضي عمري ياشمسه وسحابه


يا وافي الخصلات يا كامل الوصوف
يا مالك الأخلاق حسن ومهابة


إن غاب غيرك ماعلى غيبته حسوف
وإن غبت عني تمتلكني الكآبة


يامن بحالي منت راضي تروف
جرحٍ بقلبي منك داوي مصابه


ليتك تزور الجرح وبعينك تشوف
هذا حبيب القلب وجرحه بغيابه


يامن بشوفه ينجلي الهم والخوف
يانسل الأشراف طيب ومهابة


مالومه الشعر يوم يبلى بعزوف
وش يقول الشعر وش تحكي الكتابة


أشوفهم غيرك ويمروني طيوف
رضيت أنا بهمك وقلبي رضا به


الناس حولي ولا كأني أشوف
عذبت قلبي وهو راضي بعذابه


أجيك من شوقي وأتحدى الظروف
أعيش مع ذكراك طيفه وسرابه


صادقة بحبي والله ماتقبل حلوف
يامالك الطيب والكل ينتخى به


ودي تسوي مع قلبي معروف
لاتخلي القلب واقف عند بابه


طال فيني الليل وطال الوقوف
قلبي دون وجودك يزيد اغترابه


لاطلعت الشمس تصير بكسوف
والقمر معاك مايحسب حسابه


المودة والوفاء لك بالكفوف
والعمر لو تبي نرخص جنابه


لأجل يموت الشك والغيرة تطوف
فيه سؤال ويطلب منك الإجابة


مني سؤال للغالي كانه يشوف
ودك بقلبي..أو أعلن انسحابه ؟